திருச்சி, அக்.12 தமிழ்நாட்டில் விவசாயிகள் என்றால் தீவிரவாதிகளா? பிரதமரை சந்திக்க விடாமல் வீட்டுக்காவல் வைத்தது குறித்து அய்யாக்கண்ணு கேள்வி
சென்னையில் பல்வேறு நிகழ்ச்சிகளில் கலந்து கொள்ள பிரதமர் நரேந்திர மோடி நேற்று வருகை தந்தார். இந்நிலையில் , உச்சநீதிமன்ற உத்தரவின்படி கர்நாடக அரசு காவிரியில் உரிய நீரைத் திறக்க வேண்டும் உள்ளிட்ட பல்வேறு கோரிக்கைகளை வலியுறுத்தி, பிரதமரை சந்தித்து மனு அளிக்க சென்னை செல்ல திட்டமிட்டு இருந்த தேசிய தென்னிந்திய நதிகள் இணைப்பு விவசாய சங்கத் தலைவர் அய்யாக்கண்ணு உள்ளிட்ட விவசாயிகள் திருச்சி அண்ணாமலை நகரில் உள்ள அவரது இல்லத்தில் காவல்துறையினரால் வீட்டுக்காவலில் வைக்கப்பட்டனர்.
பிரதமரை சந்தித்து தமிழகத்திற்கு தேவையான காவிரி நீரை பெற்றுத் தருமாறு கோரிக்கை மனு அளிக்கத் திட்டமிட்டிருந்த நிலையில், காவல்துறையினர் விவசாயிகளை வெளியே செல்ல அனுமதிக்காமல் வீட்டுக்காவலில் வைத்தனர்.
இதுகுறித்து விவசாய சங்கத் தலைவர் அய்யாக்கண்ணு செய்தியாளர்களிடம் கூறுகையில்:-
சுதந்திர இந்தியாவில் யார் வேண்டுமானாலும் அமைதியான முறையில் கோரிக்கைகளை வைக்க அரசியலமைப்பு சட்டம் அனுமதித்துள்ள நிலையில், பிரதமரை சந்திக்க தடைவிதிப்பது நியாயமற்றது.
உச்சநீதிமன்ற உத்தரவின்படி தமிழகத்திற்கு அக்டோபர் மாதம் 20 டி.எம்.சி மற்றும் கடந்த மாதம் 37 டி.எம்.சி தண்ணீர் திறக்கப்பட்டிருக்க வேண்டும். ஆனால், கர்நாடக அரசு உரிய தண்ணீரை திறக்காமல் ஏரிகளுக்கு திருப்பி விடுகிறது.
மேட்டூர் அணையில் இன்னும் சில நாட்களில் தண்ணீர் நிறுத்தப்பட உள்ள நிலையில், குறுவை சாகுபடியும் செய்ய முடியாமல், சம்பா சாகுபடியும் பொய்த்துப் போய் விவசாயம் முழுமையாக அழியும் அபாயம் ஏற்பட்டுள்ளது. ஆகையால் பிரதமர் மோடி விவசாயிகளை காப்பாற்ற வேண்டும், கர்நாடகா அரசு உச்ச நீதிமன்ற உத்தரவின் படி தண்ணீர் திறக்க பிரதமர் மோடி வலியுறுத்த வேண்டும் என பிரதமரை சந்தித்து மனு அளிக்க இருந்த நிலையில் காவல்துறையினர் வீட்டு காவல் வைத்துள்ளனர். மத்திய அரசின் தூண்டுதலின் பேரில் காவல்துறை தங்களை முடக்கியுள்ளனர். உச்சநீதிமன்றம் மற்றும் உயர்நீதிமன்றத்தில் தமிழக விவசாயிகளின் இழப்பீடு மற்றும் நஷ்ட ஈடு கோரி முறையிடப்படும் என தெரிவித்தார்.
