திருச்சி, ஜன.24 திருச்சி மாநகராட்சி நகர்ப்புற நலவாழ்வு மையங்களுக்கான மருத்துவர்கள், செவிலியர்கள் மற்றும் பணியாளர்களுக்கு பணி ஆணைகளை அமைச்சர் நேரு வழங்கினார்.
சட்டப்பேரவையில் 110 விதியின் கீழ், ‘‘ஒருங்கிணைந்த, தரமான மருத்துவ சேவைகளை மக்களின் இருப்பிடங்களுக்கு அருகிலேயே வழங்கும் நோக்கில், திருச்சி மாநகராட்சிக்குட்பட்ட பகுதிகளில் 25 நகர்ப்புற நலவாழ்வு மையங்கள் புதிதாக அமைக்கப்பட்டு 07.05.2022 முதல் பொதுமக்களுக்கு மருத்துவ சேவைகள் வழங்கப்பட்டு வருகிறது.
நகர்ப்புற நலவாழ்வு மையத்தில், மருத்துவர், செவிலியர், சுகாதார ஆய்வாளர், மருத்துவமனை பணியாளர் என நான்கு பேர் கொண்ட குழுவினர் பணிபுரிவர். காலை, 8:00 மணி முதல் மதியம், 12:00 மணி வரை மற்றும் மாலை, 4:00 மணி முதல் இரவு, 8.00 மணி வரை இம்மையங்கள் செயல்பட்டு வருகிறது
இங்கு, புறநோயாளிகள் சிகிச்சை, தொற்றா நோய் (உயர் ரத்த அழுத்தம், சர்க்கரை மற்றும் புற்று நோய்) ஆய்வக பரிசோதனைகள், கர்ப்பிணிகள் மற்றும் குழந்தைகள் சிசு பராமரிப்பு, இளம் சிறார் மற்றும் வளரிளம் பருவ நலசேவை, குடும்ப கட்டுப்பாடு, தொற்றும் நோய் தடுப்பு, மனநலம் சார்ந்த நோய் கண்டறிதல் மற்றும் சிகிச்சை, கண், காது மூக்கு தொண்டை, பல் பராமரிப்பு, முதியோருக்கான மருத்துவ சேவை, விபத்து மற்றும் ஆரம்ப கால மருத்துவ சேவை என பல்வேறு சேவைகள் அளிக்கப்படுகிறது.
தற்போது திருச்சி மாநகராட்சியின் நகர்ப்புற நலவாழ்வு மையங்களில் காலியாக உள்ள மருத்துவ அலுவலர்கள்(4), செவிலியர்கள் (15) மற்றும் பணியாளர்கள்(7) ஆகிய பணியிடங்களுக்கு மாவட்ட சுகாதார சங்கம் மூலம் தேர்வு செய்யப்பட்டவர்களுக்கு நகராட்சி நிருவாகத்துறை அமைச்சர் கே என் நேரு பணி நியமன ஆணைகளை வழங்கினார்.
இதனைத் தொடர்ந்து திருச்சி திருவானைக் கோவில் பேருந்து நிறுத்தத்தில் பேருந்து வருகை நேர விவரம் குறித்த Display panel-ஐ நகராட்சி நிர்வாக துறை அமைச்சர் கே.என்.நேரு பயணிகள் பயன்பாட்டிற்காக இன்று திறந்து வைத்தார்.
இந்நிகழ்ச்சியில் மாவட்ட ஆட்சித் தலைவர் பிரதீப் குமார், மாநகராட்சி மேயர் அன்பழகன், மாநகராட்சி ஆணையர் சரவணன், மற்றும் மண்டல குழு தலைவர்கள் மாமன்ற உறுப்பினர்கள் என ஏராளமான கலந்து கொண்டனர்..
