திருச்சி, செப்.17 குமுளூர் வேளாண் பொறியியல் கல்லூரியில் B.Tech. புதிய மாணவர்கள் சேர்க்கை மற்றும் வரவேற்பு விழா:
திருச்சி மாவட்டம், இலால்குடி அருகே குமுளூரில் உள்ள வேளாண் பொறியியல் கல்லூரி மற்றும் ஆராய்ச்சி நிலையத்தில், 2026-ஆம் கல்வியாண்டிற்கான B.Tech. (வேளாண் பொறியியல்) புதிய மாணவர்கள் சேர்க்கை மற்றும் வரவேற்பு விழா 16.09.2026 அன்று சிறப்பாக நடைபெற்றது.
இவ்விழாவில் கல்லூரிப் பேராசிரியர்கள்,புதிய மாணவர்கள் மற்றும் அவர்களின் பெற்றோர்கள் திரளாகக் கலந்துகொண்டனர்.நிகழ்ச்சியின் தொடக்கமாக, பண்ணை இயந்திரங்கள் மற்றும் சக்தித் துறை (FMP) இணைப் பேராசிரியர் முனைவர் பி. காமராஜ் அனைவரையும் வரவேற்றுப் பேசினார். கல்லூரியின் முதன்மையர் முனைவர் ஆர். லலிதா தலைமையேற்று, புதிய மாணவர்களின் எதிர்காலம் சிறக்கத் தனது நல்வாழ்த்துகளைத் தெரிவித்தார்.
இவ்விழாவில் சிறப்புரையாற்றிய கல்வி ஒருங்கிணைப்பாளர். முனைவர்.எஸ். ஏ. ரம்ஜானி, “மாணவர்கள் கல்வியில் சிறந்து விளங்குவதுடன், கட்டுப்பாடான ஒழுக்கத்தைக் கடைப்பிடிக்க வேண்டும். மேலும், கல்லூரியின் பல்வேறு கூடுதல் செயல்பாடுகளிலும் ஆர்வத்துடன் பங்கேற்பது அவர்களின் முழுமையான வளர்ச்சிக்கு மிகவும் அவசியமானது” என வலியுறுத்தினார்.
நிகழ்ச்சியின் நிறைவாக, கணினி அறிவியல் துறை உதவி ஆசிரியர் திருமதி. ஜா. ஜனனிஷா நன்றியுரை ஆற்றினார். புதிய மாணவர்களின் கல்லூரி வாழ்க்கைக்கு ஊக்கமளிக்கும் வகையில் அமைந்த இவ்விழாவில் மாணவர்களின் பெற்றோர்கள் மற்றும் பேராசிரியர்கள் கலந்துகொண்டு விழாவினைச் சிறப்பித்தனர்.
