திருச்சி, டிச.16 திருச்சி அருகே உள்ள ஜீயபுரம் எலமனூர் தபோவனம் பகுதியில் உள்ள ஒரு புதரில் கடந்த 5- ஆம் தேதி பிறந்து சில மணி நேரமே ஆன ஆண் சிசு வீசப்பட்டு அழுது கொண்டிருந்தது. இது குறித்து தகவலறிந்த ஜீயபுரம் காவல்துறையினர் அந்த குழந்தையை மீட்டு திருச்சி அரசு மருத்துவமனைக்கு அனுப்பி வைத்தனர். அங்கு அந்த குழந்தை பராமரிக்கப்பட்டு வருகிறது. பின்னர் நடத்தப்பட்ட விசாரணையில் குழந்தையை பெற்றெடுத்தவர் கல்லூரி மாணவி (19) என்பது தெரியவந்தது.
அவர் திருமணம் ஆகாத நிலையில் காதலன் மூலமாக கர்ப்பம் தரித்து குழந்தை பெற்றுள்ளார்.பின்னர் சமூகத்தில் அசிங்கமாக விடும் என நினைத்து மனதை கல்லாக்கி கொண்டு குழந்தையை அவர் முதலில் வீசியது தெரிய வந்தது.
பின்னர் குழந்தை பெற்ற அந்த மாணவி விஷம் குடித்து தற்கொலைக்கு முயன்று திருச்சி அரசு மருத்துவமனையில் சிகிச்சைக்கு சேர்க்கப்பட்ட தகவல் வெளியானது.
இந்த நிலையில் சிகிச்சை பலன் அளிக்காமல் கல்லூரி மாணவி நேற்று அதிகாலை 3,30 மணியளவில் சிகிச்சை பலனளிக்காமல் இறந்தார்.
இதற்கிடையே சிகிச்சையில் இருக்கும் போது கல்லூரி மாணவி திருச்சி நீதிமன்ற நீதிபதியிடம் மரண வாக்கு மூலம் அளித்துள்ளார். அதில் தனது வாயில் விஷம் ஊற்றியதாக கூறியுள்ளார். அதைத் தொடர்ந்து காவல்துறையினல் திருப்பராய்த்துறை கிராம நிர்வாக அலுவலர் சுரேஷ் பாபு அளித்த புகாரின் பேரில் நீதிபதியிடம் மாணவி அளித்த வாக்குமூலத்தை பெற்று விசாரணை நடத்தினர். இதில் பல திடுக்கிடும் தகவல்கள் கிடைத்தன.கல்லூரி மாணவி தாயார் தோட்டத்துக்கு சென்ற நிலையில் மாணவியின் தந்தை செல்வமணி, அவரது சகோதரி மல்லிகா ஆகியோர் பூச்சிக்கொல்லி மருந்தை கல்லூரி மாணவியிடம் கொடுத்து குடிக்க வலியுறுத்தியதாக எழுத்து மூலமாக நீதிபதியிடம் வாக்குமூலம் அளித்துள்ளார். அந்த அடிப்படையில் மர்ம மரணம் கொலை வழக்காக மாற்றப்பட்டது. மேற்கண்ட 2 பேர் மீதும் கொலை வழக்கு பதிவு செய்யப்பட்டது. ஏற்கெனவே காவல்துறையினர் கஸ்டடியில் இருக்கும் செல்வமணி மற்றும் மல்லிகா ஆகிய இருவரையும் கைது செய்தனர். பின்னர் அவர்களிடம் விசாரணை நடத்தினர். விசாரணையில் திருமணமாகாமல் குழந்தை பெற்றதற்காக கல்லூரி மாணவி கல்லூரி மாணவியை விஷம் கொடுத்து கொன்றதை ஒப்புக்கொண்டனர். இதில் கல்லூரி மாணவியின் தந்தைக்கு அவரது அத்தை உடந்தையாக இருந்துள்ளார். இதைத் தொடர்ந்து அவர்கள் இருவரும் இன்று நீதிமன்றத்தில் ஆஜர் படுத்த காவல்துறையினர் முடிவு செய்துள்ளனர்.
மாணவி சாவில் திடீர் திருப்பமாக தந்தை மற்றும் அவரது அத்தை ஆகியோர் மீது கொலை வழக்கு பதிவு செய்து, கைது செய்யப்பட்டுள்ளது அந்த பகுதியில் பெரும் பரபரப்பை ஏற்படுத்தியுள்ளது.
