தமிழக முதல்-அமைச்சர் அறிவுரையின்படி, திருச்சி மாவட்டத்தில் கொரோனா நோய் பரவலைத் தடுத்திடும் வகையிலும், தற்போது பரவி வரும் ஒமைக்ரான் வைரஸ் நோய்த் தொற்று பரவலைத் தடுக்கும் விதமாகவும் மக்கள் அனைவரும் புத்தாண்டு மற்றும் பண்டிகை காலங்களில் வழிபாட்டுத் தலங்கள், காவிரிக் கரையோரங்களில் மற்றும் பொது இடங்களில் அதிக அளவில் மக்கள் கூட்டம் கூடுவதைத் தவிர்த்திட வேண்டும்.
மேலும் தனிமனித இடைவெளியினைப் பின்பற்றியும், முகக்கவசம் அணிந்தும் கொரோனா மற்றும் ஒமைக்ரான் வைரஸ் நோய்த்தொற்றிலிருந்து பொதுமக்கள் தங்களையும், தங்கள் குடும்பத்தினரைப் பாதுகாத்துக் கொள்ளவும், சமூக பரவலைக் கட்டுப்படுத்திட பெரும்பங்காற்றிடவும் கேட்டுக்கொள்ளப்படுகிறது.
வணிக நிறுவனங்களில் பணிபுரிவோர் மற்றும் வாடிக்கையாளர்கள் கட்டாயம் முகக்கவசம் அணிய வேண்டும். அவ்வாறு அணியாதவர்கள் மீது உரிய நடவடிக்கை மேற்கொள்ளப்படும் என எச்சரிக்கப்படுகிறது என திருச்சி மாவட்ட கலெக்டர் எஸ்.சிவராசு வெளியிட்டுள்ள செய்தி குறிப்பில் தெரிவித்துள்ளார்.
